Авторларға арналған ақпарат

SDU Law Journal жылына төрт рет (наурыз, маусым, қыркүйек және желтоқсан айларында) жарық көреді.

Жіберу мерзімдері келесідей:

Наурыз басылымы үшін: соңғы мерзім – 10 ақпан.
Маусым басылымы үшін: соңғы мерзім – 10 мамыр.
Қыркүйек басылымы үшін: соңғы мерзім – 10 тамыз.
Желтоқсан басылымы үшін: соңғы мерзім – 10 қараша.

Авторларға арналған нұсқаулық

Журналдың бір нөмірінде автор 1 (бір) мақала жариялай алады. Қолжазбаны жібермес бұрын автор(лар) мақаланың барлық критерийлерге сәйкес келетініне көз жеткізуі қажет. Жіберілген қолжазбалар түпнұсқа зерттеулер болуы тиіс, яғни бұрын жарияланбаған және басқа ғылыми журналдың редакциясында жариялану мақсатымен қарастырылмауы керек. Талаптарға сай рәсімделмеген мақалалар жариялауға қабылданбайды және авторларға қайтарылады. Авторлардың өз саласына жаңалық әкелетін әрі елеулі үлес қосатын қолжазбаларды ұсынғандары жөн. Әсіресе, заң ғылымы және құқық қолданудағы жаңа жетістіктерді, жеткілікті деңгейде зерттелмеген мәселелер мен олардың аз қарастырылған қырларын қамтитын жұмыстарға басымдық беріледі.

Мақала құрылымы

Қолжазбаның бастапқы бетінде (Қосымша 1) Ғылыми-техникалық ақпараттың мемлекетаралық рубрикаторының (ҒТАМР) коды, мақала атауы, автор(лар)дың аты-жөні, жұмыс орны, жауапты автордың электрондық поштасы, аңдатпа және кілт сөздер қазақ, ағылшын және орыс тілдерінде берілуі қажет. Авторларға ҒТАМР кодын Қазақстан Республикасының Ұлттық мемлекеттік ғылыми-техникалық сараптама орталығы (ҰМҒТСО) ұсынған тізімнен алуға кеңес беріледі.

Аңдатпа 150-200 сөзден тұруы қажет;
Авторлар ең маңызды кілт сөздерді (4-6 сөз) көрсетуі керек;
Кіріспеде зерттеу тақырыбына шолу, зерттеу сұрағы(тары) немесе зерттеу проблемасы, гипотезасы (қажет болған жағдайда), мақаланың мақсаты, өзектілігі, негізгі дәйек (аргумент) көрсетілуі тиіс. Сондай-ақ, келесі бөлімдерге қысқаша шолу жасалуы қажет: зерттеу әдіснамасы мен әдістері, теория мен тұжырымдамалар және зерттеу нәтижесі;
Әдебиетке шолу бөлімінде мақала тақырыбына қатысты осыған дейін басқа зерттеушілер жасаған жұмыстарға және басқа да ғылыми дереккөздерге сыни баға берілуі тиіс. Сонымен бірге, автор(лар) зерттеу олқылық(тар)ын (research gap) көрсетуі қажет;
Зерттеу әдіснамасы бөлімінде деректердің қалай жиналғандығы, деректерді жинауда қолданылған құралдар, зерттеу әдіс(тер)і, деректердің қалай сарапталғандығы баяндалуы керек;
Зерттеу нәтижелері ұсыныстар мен жаңа қорытындыларды қамтуы тиіс;
Талқылау бөлімі жұмыстың нәтижелерін қорытындылауды, зерттеудің жаңалығы мен өзектілігін негіздеуді және нәтижелерді қолдану бойынша ұсыныстарды қамтиды;
Қорытындыда зерттеу нәтижелері қысқаша баяндалып, болашақта зерттеу үшін жаңа тақырыптар немесе зерттеу сұрақтары ұсынылуы қажет;
Кестелер, суреттер және диаграммалар мәтіннің тиісті жерлеріне енгізілуі тиіс;
Қажет болған жағдайда, мәтінге қосымшалар қосуға болады. Қосымшалар ұсынылса, олар мақаланың соңында көрсетілуі қажет;
Мақала көлемі аңдатпа, кестелер, сілтемелер және әдебиеттер тізімін қосқанда 5 000-9 000 сөз аралығында болуы қажет (қосымшалар саналмайды).
Мәтін ішіндегі сілтемелер, пайдаланылған әдебиеттер тізімі, қолжазба мәтіні APA (American Psychological Association) 7-ші басылымы стилінде (Қосымша 2) рәсімделуі қажет. Мәтін ішінде дәйексөз келтіру жақша ішінде автор-дата форматында болуы тиіс;
Алғыс білдіру бөлімінде (бар болған жағдайда) қаржылық қолдау туралы ақпарат (гранттар, бағдарламалар) беріледі, зерттеуге көмек көрсеткен тұлғалар немесе мекемелерге арналған алғыс сөздер жазылады.
Әдебиеттер тізімі бөлек бөлім ретінде APA 7-ші басылымы стилінде жұмыстардың жазылған тілінде ұсынылуы керек. Әрбір дереккөзге тиісті сілтемелер берілуі қажет;
Ағылшын тіліндегі мақалалар американдық немесе британдық ағылшын тілі стильдерінің бірінде жазылуы қажет және сол стиль қолжазбада басынан аяғына дейін сақталуы тиіс.
Қазақ тіліндегі мәтіннің кириллицадан латын әліпбиіне транслитерациясын жасау үшін https://qazlat.kz сайтындағы онлайн конвертер бағдарламасын қолдануға кеңес беріледі. Орыс тіліндегі мәтіннің кириллицадан латын әліпбиіне транслитерациясын жасау үшін http://www.translit.ru сайтындағы онлайн конвертер бағдарламасын қолдануға болады.
Қысқартылған атаулар (аббревиатуралар) алғаш қолданылғанда толығымен жазылып, қасына жақша ішінде атаудың қысқартылған нұсқасы көрсетілуі қажет. Келесі жолы қолданылғанда атаудың қысқартылған нұсқасы тұрақты түрде көрсетілуі тиіс.

Мәтін пішімі

Мақала мәтіні Times New Roman қарпімен, жолдардың шеті біркелкі тегістелген күйде, 12 кегль және 1.15 жоларалық интервалмен терілуі қажет. Кейбір тұжырымдамалар, маңызды ойлар мен терминдерді қалың (bold) немесе қиғаш (italic) форматта жазуға болады.
Тарау тақырыптары Times New Roman қарпімен, 14 кегльмен, қалың қаріппен, ал тарау ішіндегі бөлім тақырыптары Times New Roman қарпімен, 12 кегльмен, қиғаш қаріппен терілуі керек;
Жаңа параграф азат жолдан шегініспен басталуы керек. Шегініс 1.27 см (пернетақтадағы TAB түймесін басу арқылы жасауға болады) болуы тиіс.
Кестелер ретімен нөмірленіп (мысалы: Кесте 1), атауы кесте нөмірінің асты мен кестенің үстінде сол жағынан қиғаш қаріппен жазылуы қажет. Кесте алынған дереккөз немесе кестеге қатысты маңызды ақпарат кестенің астында сол жағынан Ескерту. сөзінен кейін жазылуы тиіс.
Суреттер мен диаграммалар мақаланың басынан бастап ретімен нөмірленуі керек (мысалы: Сурет 1, Диаграмма 1). Сурет немесе диаграмма атауы сурет/диаграмма нөмірінің асты мен суреттің/диаграмма үстінде сол жағынан қиғаш қаріппен жазылуы керек. Сурет/диаграмма алынған дереккөз немесе суретке/диаграммаға қатысты маңызды ақпарат суреттің/диаграмманың астында сол жағынан Ескерту. сөзінен кейін жазылуы тиіс.
Сурет, кесте, график және диаграммалар қолжазба мәтінінің 30%-нан аспауы қажет. Сурет, график және диаграммалар жоғары сапада JPEG форматында берілуі тиіс.
Барлық мақалалар A4 форматында (210x297 мм) жазылу қажет.
Мақаланың төрт жағынан да шеті 2 см болуы тиіс.
Бет нөмірлері беттің төменгі оң жақ бұрышына қойылуы керек.
Қолжазба журнал сайтындағы қолжазбаны жүктеу порталы арқылы электронды форматта (doc және docx) қабылданады.

Авторларға журналдың мақсаттары мен міндеттерін мұқият зерттеп, осы саладағы жаңалық пен елеулі жетістіктерді білдіретін қолжазбаларды тапсыруға кеңес беріледі. Сонымен қатар, авторлар үшін қолжазбаларды бағалау үшін рецензиялау үдерісінде қолданылатын критерийлермен танысу маңызды.